Clicky

የወቅቱን የኢህአዴግ የስራ አስፈፃሚ ኮሚቴ ግምገማ አስመልክቶ ከኢዴፓ የተሰጠ መግለጫ!

በቅርቡ የኢህአዴግ ስራ አስፈፃሚ ኮሚቴ የአገሪቱን ወቅታዊ ሁኔታ መነሻ አድርጎ ያካሄደውን ግምገማ አስመልክቶ በግንባሩ መሪዎች እየተሰጡ ያሉ መግለጫዎችን ኢዴፓ በትኩረት እየተከታተላቸው ይገኛል፡፡ የኢዴፓ ስራ አስፈፃሚ ኮሚቴ ይህ የወቅቱ የኢህአዴግ ስራ አስፈፃሚ ኮሚቴ ግምገማ፤-

ምን ያህል ካለፉት ጊዜያቶች ግምገማ የተለየ እንደሆነ፣
በአሁኑ ወቅት በአገራችን ለተከሰተው ከፍተኛ የፖለቲካ ቀውስ ምክንያት የሆኑ ችግሮቻችን ምን ያህል በጥልቀት ተዳሰዋል፣
የታሰበው የተሃድሶ እንቅስቃሴ እንዴት በተግባር ሊተረጎም እንደሚችልና የመጨረሻ ግቡ ምን መሆን እንዳለበት ስለአስቀመጠው አጠቃላይ አቅጣጫ ሰፊ ውይይት አድርጎ የሚከተሉትን አቋሞች ወስዷል፡፡

የኢህአዴግ ስራ አስፈጻሚ ኮሚቴ ግምገማ ምን ያህል ካለፉት ጊዜያት የግንባሩ ግምገማዎች የተለየ እንደሆነ በተደረገው ውይይት- በግምገማው
ሀ- የኢህአዴግ ስራ አስፈፃሚ ኮሚቴ ቀደም ሲል ከነበረው የግንባሩ አቋም በተለየ ለተከሰተው አገራዊ የፖለቲካ ቀውስ ውጫዊ ሃይሎችን ተጠያቂ ከማድረግ ይልቅ እራሱን ተጠያቂ ማድረጉና ለዚህም ግልፅ ይቅርታ መጠየቁ፣
ለ- በአገራችን የተከሰተው የፖለቲካ ቀውስ ከአሁን ቀደም ሲባል እንደነበረው ጥቂት ፀረ-ሰላም ሃይሎች እዚህም እዚያም የፈጠሩት ጊዜያዊና ቀላል ችግር ሳይሆን በአግባቡ ካልተፈታ የአገርን ህልውና ሊያፈርስ የሚችል አሳሳቢ ችግር መሆኑ መታመኑ፣
ሐ- ከአሁን ቀደም ይባል እንደነበረው ዋናው የወቅቱ የፖለቲካ ቀውስ መነሻ ከመልካም አስተዳደርና ከኪራይ ሰብሳቢነት ጋር የተያያዙ የአፈፃፀም ችግሮች ብቻ ሳይሆኑ ፀረ- ዴሞክራሲነትና የሰብዓዊ መብት ጥሰት፣ የፖለቲካ ምህዳር መጥበብ፣ የብዙሃን ማህበራት ነፃነት ማጣት፣ የመገናኛ ብዙሃን ድክመት፣ የብሄራዊ መግባባት አለመፈጠርና በብሄር ማንነትና በአገራዊ ማንነት መካከል ሚዛኑን ያልጠበቀ ስራ አለመሰራቱ እንደ ችግር ምንጭነት መገለፃቸው በግንባሩ ግምገማ እንደታዩ አዳዲስ ነጥቦች ብቻ ሳይሆን እንደግምገማው ጠንካራ ጎን ሊታዩ የሚችሉ መሆኑን የኢዴፓ ስራ አስፈጻሚ አምኖበታል፡፡

2.1- የኢህአዴግ ስራ አስፈፃሚ ኮሚቴ ግምገማ በአሁኑ ወቅት በአገራችን ለተከሰተው ከፍተኛ የፖለቲካ ቀውስ ምክንያት የሆኑ ችግሮችን ምን ያህል በስፋትና በጥልቀት እንደዳሰሰ ለማወቅ በተደረገው ውይይት- የኢህአዴግ ስራ አስፈፃሚ ኮሚቴ ባካሄደው ግምገማ በችግር ምንጭነት እስከ አሁን ዘርዝሮ ያስቀመጣቸው ነጥቦች በእርግጥም በችግር ምንጭነት ሊጠቀሱ የሚችሉና የሚገባቸው መሆናቸው እንደተጠበቀ ሆኖ የስራ አስፈፃሚው ግምገማ ያልተወያየባቸው ወይም ተወያይቶ እንደችግር ምንጭነት አምኖ ያልተቀበላቸው ሌሎች መሰረታዊ ችግሮች መኖራቸውን የኢዴፓ ስራ አስፈፃሚ ኮሚቴ ገምግሟል፡፡ በዚህም መሰረት፤-
ሀ- ከሁሉም በላይ በአሁኑ ወቅት አገራችን ለገባችበት የፖለቲካ ቀውስ ዋነኛ መነሻ ምክንያት የሆነው የአገሪቱ ህገ- መንግስትና በተዋረድ የሚገኙ ህጎች ለአገር አንድነት ቀጣይነት ዋስትና የነሱና ለብሄር ማንነት ብቻ ትኩረት የሰጡ መሆናቸው፣
ለ- የፓርቲዎች አደረጃጀትም ሆነ የአገሪቱ የፌደራል አደረጃጀት ሌሎች ጠቃሚ መመዘኛዎችን የረሳና በዋናነት ቋንቋንና ብሄረሰባዊ ማንነትን መሰረት ያደረገ መሆኑ፣
ሐ- ላለፉት 26 ዓመታት በመንግስት መገናኛ ብዙሃን፣ በገዥው ፓርቲ ልሳኖችና በገዥው ፓርቲ ካድሬዎች ሲካሄድ የነበረው ፕሮፖጋንዳ በህዝቡ አንድነትና የጋራ እሴቶች ላይ ሳይሆን በልዩነትና በአሉታዊ የታሪክ ገፅታዎቻችን ላይ ያተኮረ መሆኑ፣
መ- ህዝቡ የኢህአዴግን መንግስት ፍትህ አልባና አድሎአዊ አድርጎ እንዲያይ በማድረግ ረገድ የፓርቲ የንግድ ድርጅቶች መኖርና የህውሃት የበላይነት እንደችግር ምንጭነት አለመታየቱ፣ በአጠቃላይ የህግ፣ የአደረጃጀትና የፕሮፖጋንዳ ስልት ችግሮች ለተፈጠረው ችግር መሰረታዊ መነሻ ምክንያቶች መሆናቸውን የኢህአዴግ ስራ አስፈፃሚ ኮሚቴ አለመቀበሉ የተካሄደውን ግምገማ እጅግ ጎዶሎና ችግሩን በዘላቂነት ለመፍታት የማያስችል እንደሚያደርገው በኢዴፓ ስራ አስፈፃሚ ታምኖበታል፡፡

3.1- በኢህአዴግ እየተካሄደ ያለው የተሃድሶ እንቅስቃሴ እንዴት በተግባር መተርጎም እንዳለበትና የመጨረሻ ግቡ ምን መሆን እንዳለበት በተደረገው ውይይት-
ሀ- ኢህአዴግ በዋናነት ትኩረት ያደረገው ውስጣዊ ችግሩን ለመፍታት መሆኑና የእኔ ችግር ሲፈታ የአገሪቱም ችግር ይፈታል ወደሚል የተለመደ አጠቃላይ ግምገማ መድረሱ አገሪቱ ውስጥ ያለውን ነባራዊ ሁኔታ በአግባቡ ያልተገነዘበ መሆኑን እንደሚያሳይ፣ እንዲህ አይነቱ የራስንና የአገርን ህልውና አንድና አንድ አድርጎ ማየትም ችግሩን በዘላቂነት ለመፍታት የማያስችል ፀረ-ዴሞክራሲ አቋም መሆኑን ኢዴፓ አምኖበታል፡፡
ለ- ኢህአዴግ የችግሩ ዋና ምንጭና ተጠያቂ እራሱን ማድረጉ በጎ አመለካከት ሆኖ እያለ የችግሩ መፍትሔ ብቸኛ ቁልፍ የሚገኘው በሱ እጅ ብቻ እንደሆነ አድርጎ ሲያስብ መታየቱ ዛሬም እንደትናንቱ ከራሱ ጠባብ አመለካከት እንዳልተላቀቀና እራሱንም ሆነ የአገሪቱን አጠቃላይ ሁኔታ ለመለወጥ ያገኘውን ይህንን የመጨረሻ እድል በአግባቡ እየተጠቀመበት እንዳልሆነ የሚያሳይ መሆኑ በኢዴፓ ስራ አስፈፃሚ ታምኖበታል፡፡ የኢዴፓ ስራ አስፈፃሚ ኮሚቴ የተሃድሶ ሂደቱን አፈፃፀም በተመለከተ ባደረገው ውይይት- የተሃድሶ ሂደቱ መመራትና መካሄድ ያለበት በኢህአዴግ ብቻ ሳይሆን በአዋጅ በተቋቋመ መነሻና መድረሻ ግቡ በግልፅ በታወቀ፣ በተሃድሶ ሂደቱ ሊፈፀሙ የሚገባቸው ዝርዝር ጉዳዮች በግልፅ ተቆጥረው በተሰጡትና የስራ ዘመኑ አስቀድሞ በተወሰነለት ሁሉን አቀፍ ተቋም መሆን እንዳለበት አምኖበታል፡፡ ከዚህ ውጭ ኢህአዴግ ብቻውን የህዝቡን የተቃውሞ ትኩሳት እየለካ የሚሰጠውና የሚነሳው የተሃድሶ እርምጃ ህዝባዊ ተቀባይነት ሊያገኝም ሆነ ችግሩን በዘላቂነት ሊፈታ እንደማይችል ታምኖበታል፡፡
ይህ የተሃድሶ ሂደት ሃቀኛና አስተማማኝ መፍትሄ እንዲያመጣ ከተፈለገም ኢህአዴግ ስልጣኑን ለማራዘም የማይጠቀምበትና የመጨረሻ ግቡም ፍፁም ነፃና ፍትሃዊ ምርጫ በአገሪቱ ተካሂዶ ህዝቡ የፈለገውን ፓርቲ ለስልጣን ማብቃት የሚችልበት መሆን እንደሚገባው ታምኖበታል፡፡ ህዝቡ ይህንን የተሃድሶ እንቅስቃሴ ማመንና መደገፍ የሚገባውም የወረቀት መግለጫና የመድረክ ላይ መፈክር ስለሰማ ሳይሆን በተጨባጭ ለዲሞክራሲ ስርዓት ግንባታና ለአገር አንድነት እንቅፋት የሆኑ ህጎችና አደረጃጀቶች ሲሻሻሉ ወይም ሲቀየሩ፣ በዴሞክራሲ ተቋምነት የሚታወቁትን ምርጫ ቦርድን፣ የሰብዓዊ መብት ኮሚሽንን፣ እንባ ጠባቂ ኮሚሽንን፣ ፀረ-ሙስና ኮሚሽን የመሳሰሉ ተቋማት ነፃና ገለልተኛ ሆነው እንደገና እንዲደራጁ ሲደረግ መሆን አለበት፡፡ የሴቶችና የወጣቶች ማህበራትን፣ የሰራተኞችና የመምህራን ማህበራትን የመሳሰሉ የህዝባዊና የሙያ ተቋማትም ከፓርቲ መሳርያነት ወደ እውነተኛ የህዝብና የሙያ ተቋምነት መቀየር አለባቸው፡፡ የኢትዮጵያ ብሮድካስቲንግ ኮርፖሬሽንን የመሳሰሉት የሚዲያ ተቋማትም ከፓርቲ የፕሮፖጋንዳ መሳሪያነት ወደ እውነተኛ የህዝብ መገናኛ ብዙሃንነት መቀየር አለባቸው፡፡
ሐ- የኢዴፓ ስራ አስፈፃሚ ኮሚቴ የእስረኞች መፈታትን አስመክልቶ የተሰጠውን መግለጫ በተመለከተ ባደረገው ውይይትም ኢህአዴግ በራሱ ውስጥም ሆነ በአገሪቱ ፀረ- ዴሞክራሲ አቋም ሲያራምድና ፀረ-ዴሞክራሲ ድርጊት ሲፈፅም እንደነበረ በአካሄደው ግምገማ አምኖ ከተቀበለ በኋላ በአገሪቱ የፖለቲካ እስረኞች እንዳሉ አምኖ ለመቀበል መቸገሩ ምን ያህል በሃሳብ ግጭት የተሞላ አቋም ላይ እንደሚገኝና የተሃድሶ ሂደቱን በሙሉ ልብ ለማካሄድ እየተቸገረ መሆኑን የሚያሳይ ሆኖ አግኝቶታል፡፡ ይህ የተሃድሶ ሂደት የህዝብ ተቀባይነት እንዲያገኝና ዘላቂ መፍትሄ እንዲያመጣ ከተፈለገ በቅድሚያ ኢህአዴግ የፖለቲካ እስረኞች መኖራቸውን አምኖ በመቀበል እነዚህ የፖለቲካ እስረኞች ያለምንም ቅድመ ሁኔታ እንዲፈቱ ማድረግ አለበት፡፡ የሚፈቱት የፖለቲካ እስረኞችም በመገናኛ ብዙሃን ታዋቂነት ያላቸው ብቻ ሳይሆኑ ከወረዳ እስከ ማዕከል ድረስ ከማንኛውም የፖለቲካ ጉዳይ ጋር በተያያዘ የታሰሩ እስረኞች መሆን አለባቸው፡፡ በእስር ላይ የሚገኙ የፖለቲካ ሰዎች ብቻ ሳይሆኑ በሌሉበት ተፈርዶባቸው በስደት ላይ የሚገኙ ግለሰቦችና ስርዓቱን በትጥቅ ትግል ለመፋለም ተደራጅተው የሚንቀሳቀሱ ድርጅቶች ሁሉም ምህረት ተደርጎላቸው የተሃድሶ ሂደቱ አካል እንዲሆኑ መጋበዝ ያስፈልጋል፡፡

በአጠቃላይ በኢዴፓ እምነት የወቅቱ የተሃድሶ ሂደት ለዘላቂ ውጤት ሊበቃ የሚችለው ከዚህ በላይ ለማብራራት በተሞከረው መንገድ በኢህአዴግ ግምገማ በችግር ምንጭነት የተጠቀሱት ነጥቦች እንደገና በአግባቡ ተሟልተው፣ የተሃድሶው ሂደት አፈፃፀም ከኢህአዴግ ብቸኛ ቁጥጥር ወጥቶ ሁሉን አቀፍ በሆነ ህጋዊ ተቋም መመራት ሲችል እንደሆነ ታምኖበታል፡፡

የኢዴፓ ስራ አስፈፃሚ ኮሚቴ
ጥር 2010 ዓ.ም
አዲስ አበባ

ሃቀኛ ትኩረት ለውጤታማ ድርድር ወሳኝ ነው!

በሃገራችን ለተከሰተው የፖለቲካ ቀውስ ዘላቂ መፍትሄ ለማምጣት በማሰብ በሃገሪቱ የፖለቲካ ፓርቲዎች መካከል የቅድመ ድርድር ውይይት ከተጀመረ ከሁለት ወር በላይ ማስቆጠሩ ይታወሳል፡፡ በዚህ ግዜ ውስጥ የፖለቲካ ፓርቲዎች በድርድሩ የአካሄድ ስነ-ስርዓት ዙሪያ ለ7 ግዜ ተገናኝተን የተወያየን ቢሆንም በፖለቲካ ፓርቲዎች መካከል ያለው ግንኙነት ወደ ተሻለ የመግባባትና የመቻቻል መንፈስ ከመሸጋገር ይልቅ እንደተለመደው ገና ከጅምሩ የመክሸፍ አደጋ እየታየበት ነው፡፡

በቅድሚያ የተቃዋሚ ፓርቲዎች ስብስብ የሆነው መድረክ ከአንድ ለዴሞክራሲያዊ ስርዓት ግንባታ እታገላለሁ ከሚል የፖለቲካ ሃይል በማይጠበቅ መንገድ ̋ በኢትዮጵያ ውስጥ ያለሁት ጠንካራና ሀቀኛ ተቃዋሚ እኔ ብቻ ስለሆንኩ ብቻዬን ከኢህአዴግ ጋር መደራደር አለብኝ ” በማለት የድርድሩን መድረክ ለቆ ወጥቷል፡፡ በመቀጠልም ገዥው ፓርቲ ኢህአዴግ በተለመደው አንባገነናዊ ባህሪው ድርድሩ በገለልተኛ አደራዳሪዎች እንዲካሄድ ከተቃዋሚ ፓርቲዎች የቀረበውን ጥያቄ ያለ አግባብ አልቀበልም በማለቱ 1 ተቃዋሚ ፓርቲ ፓርቲ ድርድሩን ለቆ መውጣቱን አስታውቋል፡፡

በኢዴፓ እምነት ለድርድሩ ሂደት መዳከም ምክንያት እየሆኑ ያሉት ከግትር አቋሙ መለዘብ ያልቻለው ገዥው ፓርቲ ኢህአዴግና ያለ አሳማኝ ምክንያት የድርድሩን ሂደት ጥለው እየወጡ ያሉት ተቃዋሚ ፓርቲዎች ናቸው፡፡ ኢህአዴግ በሃገራችን እየተፈጠረ ያለው የፖለቲካ ውጥረትና ቀውስ በሃቀኛ የውይይትና የድርድር ሂደት መፍትሄ እስካላገኘ ድረስ የሃገሪቱም ሆነ የራሱም ህልውና በአደገኛ ጠርዝ ላይ መገኘት መቻላቸውን መገንዘብ ባለመቻሉ በአንባገነናዊ ባህሪው ቀጥሎበታል፡፡ በሃገራችን የፖለቲካ ፓርቲዎች መካከል ከሚታየው ከፍተኛ የቅራኔና ያለመተማመን እውነት አንጻር ድርድሩ በገለልተኛ አደራዳሪዎች እንዲካሄድ ከተቃዋሚ ፓርቲዎች የቀረበው ጥያቄ ተገቢና ምክንያታዊ ቢሆንም ይሄንን ጥያቄ ኢህአዴግ ሊቀበለው አለመፈለጉ ዛሬም እንደትናንቱ ከአምባገነናዊ ባህሪው ያለመላቀቁ ዋና ማሳያ ነው፡፡

ኢዴፓ ድርድሩ በገለልተኛ አደራዳሪዎች እንዲመራ የቀረበውን ጥያቄ ሙሉ ለሙሉ የሚደግፈው ቢሆንም ይሄንን ጥያቄ ኢህአዴግ አልተቀበለም ብሎ አጠቃላይ የድርድሩን ሂደት አቋርጦ መውጣት ግን ተገቢ ነው ብሎ አያምንም፡፡ ኢዴፓ የድርድር ሂደት በሰጥቶ መቀበል መርኅ የሚመራ ከመሆኑም በላይ በሁሉም ነገርም አሸናፊ መሆን የማይጠበቅበት ሂደት መሆኑን ስለሚነዘብ ነው፡፡ በሌላም በኩል በአንድ የስነ-ስርዓት ጥያቄ ላይ ልዩነት ስለተፈጠረ ብቻ ሂደቱን ጥሎ መውጣት ተገቢ እርምጃም ነው ብሎ አያምንም፡፡

ኢዴፓ ሃገራችን በአሁኑ ወቅት ለምትገኝበት የፖለቲካ ቀውስ ብቸኛው መድህን ውይይትና ድርድር መሆኑን ከልቡ ስለሚያምን ከተዳራዳሪ ፓርቲዎች ጋር ያሉትን ልዩነቶች በልዩነት እያስመዘገበ በድርድሩ ሂደት መቀጠልን ይፈልጋል፡፡ የድርድሩን አጠቃላይ ሂደት ከገመገመ በኋላ የድርድሩን የመጨረሻ ውጤት የመቀበልና ያለመቀበል ጉዳይ ከኢትዮጵያ ህዝብ ፍላጎትና ጥቅም ጋር አያይዞ በመጨረሻ የሚደርስበት ውሳኔ ይሆናል፡፡ ገዥው ፓርቲም ሆነ ተቃዋሚ ፓርቲዎች በዚህ ዓይነት የድርጅትን ሳይሆን የሃገርንና የህዝብን ጥቅም ባስቀደመ መንፈስ ድርድሩን በሃላፊነት ስሜት ሊያካሂዱ ይገባል ብሎ ኢዴፓ ያምናል፡፡

ከሁሉም በላይ የጉዳዩ ዋና ባለቤት የሆነው የኢትዮጵያ ህዝብ በፖለቲካ ፓርቲዎች መካከል የሚደረግ ድርድር የወደፊት ሰላሙንና ሃገራዊ ህልውናውን የሚወስን ቁም ነገር መሆኑን ተገንዝቦ ለድርድሩ ሂደት ልዩ ትኩረት መስጠት ይኖርበታል፡፡ በተጨማሪም ተደራዳሪ ፓርቲዎች በሃገራዊ የሃላፊነት ስሜት እንዲደራደሩ የራሱን የማይተካ ግፊት እንዲያደርግ በዚህ አጋጣሚ ኢዴፓ ጥሪውን ያስተላልፋል፡፡

የኢዴፓ ስራ አስፈጻሚ ኮሚቴ
መጋቢት 29 2009 ዓ.ም

ኢዴፓ የጋራ ም/ቤቱ አሰራር የማይስተካከል ከሆነ ከጋራ ምክር ቤቱ ሊወጣ እንደሚችል ለጋራ ም/ቤቱ በፃፈው ደብዳቤ አሳወቀ ።

Ethiopian Democratic Partyከኢዴፓ የተሰጠ መግለጫ
የኢትዮጵያውያን ዴሞክራሲያዊ ፓርቲ (ኢዴፓ) የአዲስ አበባ – ኦሮሚያ የተቀናጀ ማስተር ፕላንን ተከትሎ ከተቀሰቀሰው ተቃውሞና በቅርቡ ደግሞ የወልቃይት – ጠገዴን ህዝብ የማንነት ጥያቄን ተከትሎ እስከተፈጠረው ከፍተኛ ቀውስ ድረስ ጉዳዩችን እየተከታተለ መግለጫዎችን ሲሰጥ መቆየቱ ይታወሳል፡፡ በሰጣቸው መግለጫዎችም ፓርቲያችን በዚህ ግጭትና ተቃውሞ የሃገሪቱ ቀውስ ተባብሶ እንደ ሃገርም እንደ ህዝብም ተገቢ ያልሆነ ዋጋ ከመክፈላችን በፊት መንግስት፣ ህዝቡ፣ የመገናኛ ብዙሃንና የፖለቲካ ሃይሎች በተገቢው መንገድ ሃላፊነታቸውን እንዲወጡ መልዕክት አስተላልፏል፡፡ የችግሩን መንስዔዎችና መፍትሄዎችንም ለማመላከት ሞክሯል፡፡ ይሁን እንጂ ኢ.ዴ.ፓ በነሐሴ 6 ቀን 2008 ዓ.ም እና ከዚያም በፊት የሰጣቸውን ጋዜጣዊ መግለጫዎች የተለያዩ የመንግስት ሚዲያዎች በተዛባ መንገድ ከማቅረብ አልተቆጠቡም፡፡ ይህ በዚህ እንዳለ የአገር አቀፍ የፖለቲካ ፓርቲዎች የጋራ ምክር ቤት ነሐሴ 10 ቀን 2008 ዓ.ም በነበረው አስቸኳይ ስብሰባ በሃገሪቱ ወቅታዊ ሁኔታ ላይ ተወያይቷል፡፡ ነገር ግን ፓርቲያችን ውሳኔው የጋራ ምክር ቤቱን አዋጅና ደንብ የጣሰ ሆኖ አግኝቶታል፡፡ ምክር ቤቱ አካሂዱን እንዲያስተካክል ፓርቲያችን በተለያዩ ግዚያት ጥሪ አድርጓል፡፡ የሃገራችንን መፃዒ ዕድልና ለዲሞክራሲው ግንባታ የበኩላችንን ድርሻ ለመወጣት ባለን ፅኑ እምነት ረዥም ጉዞ በምክር ቤቱ ውስጥ ተሳትፎ በማድረግ ብንጓዝም በውስጣዊ አሰራሩና በመንግሥት መገናኛ ብዙሃን የሚፈፀሙብን ጫናዎች ሊታረሙ አልቻሉም፡፡ ስለሆነም ፓርቲያችን የሚከተሉትን ውሳኔዎች አስተላልፏል፡፡

ኢዴፓ በኢትዮጵያ የመድበለ ፓርቲ ስርዓት እንዲጠናከርና ዴሞክራሲ እንዲጐለብት የበኩሉን አስተዋጽኦ እያደረገ መሆኑ ይታወቃል፡፡ ይሁን እንጂ በአባሎቻችን ላይ እስራት፣ ወከባና እንግልት እየተፈጸመባቸው ይገኛል፡፡ከነዚህም ውስጥ በሰሜን ወሎ፣ በደቡብ ወሎ ደሴና አካባቢው፣ በምስራቅ ጐጃም በደብረ ማርቆስና አካባቢው ያሉ አባሎቻችን በመንግስት የፀጥታ ሃይሎች እየታሰሩና እየተዋከቡ ይገኛሉ፡፡ በአባሎቻችን ላይ የሚደርሰውን እስራት፣ እንግልትና ወከባ እናወግዛለን፡፡

ኢ.ዴ.ፓ ነሐሴ 6 ቀን 2008 ዓ.ም በአገራችን ወቅታዊ ሁኔታ ላይ ጋዜጣዊ መግለጫ መስጠቱ ይታወሳል፡፡ ነገር ግን መግለጫውን በመንግስት ቁጥጥር ስር ያሉት መገናኛ ብዙሃን ማለትም ኢ.ዜ.አ፣ ፋና፣ አዲስ ዘመን ጋዜጣና የአማራ ብሄራዊ ክልል ቴሌቭዠን የመግለጫችንን ይዘት አዛብተው ያቀረቡ ሲሆን ኢ.ቢ.ሲ ጭራሽ ዜናውን አልሰራውም፡፡ ይህ የሚያሳየው የመንግስት ሚዲያዎች የተለየን ሃሳብ በአግባቡ ያለማስተናገድ አባዜ የተጠናወታቸውና የጋዜ ጠኝን ስነ-ምግባር የጐደላቸው መሆኑንን እየጠቆምን ድርጊቱን ፓርቲያችን አጥብቆ ያወግዛል፡፡ የህብረተሰቡን መረጃ የማገኝት መብት እንዲያከብሩና አሰራራቸውንም ፈትሸው እንዲያስተካክሉ ኢ.ዴ.ፓ. ይጠይቃል፡፡

የአገር አቀፍ ፖለቲካ ፓርቲዎች የጋራ ምክር ቤት ማክሰኞ ነሐሴ 10 ቀን 2008 ዓ.ም በጠራው አስቸካይ ስብሰባ በአገሪቱ ወቅታዊ ጉዳይ ላይ ተወያይቷል ፡፡ ነገር ግን ውሳኔ የተላለፈው የፖለቲካ ፓርቲዎችን ስነምግባር ለመደንገግ የወጣውን አዋጂ ቁጥር 662/2002ዓ.ም አንቀጽ 26 ንዑስ ቁጥር 11 እና የተሸሻለው መተዳደሪያ ደንብ አንቀፅ 13 (1) መሰረት የጋራ ምክር ቤቱ ማንኛውንም ውሳኔ በጋራ መግባባት ወይም በተባበረ ድምፅ ይወስናል የሚለውን አንቀፅ ሙሉ ለሙሉ በመጣስ ውሳኔ ተላልፏል፡፡ የጋራ ምክር ቤቱ ባፀደቀው ደንብ መሰረት ውሳኔዎቹ መተላለፍ የሚገባቸው በስምምነት (consensus) መሆኑን ቢገልፅም ውሳኔው የተላለፈው አዋጁንና ደንቡን በሚጥስ ሁኔታ ነው፡፡ የህዝብን ጥያቄ የማቅረብ መብት በተመለከተና በተለያዩ የሃገራችን አካባቢዎች የተከሰቱ ህዝባዊ ሰልፎችን በተመለከተ በተደረገው ውይይት ኢ.ዴ.ፓ በብቸኝነት በልዩነት መውጣቱ እየታወቀ በሚዲያ የተገለፀበት መንገድ ግን ከስምምነት ውጪ በተዛባ መልኩ መሆኑን ፓርቲያችን ተገንዝቧል፡፡ ስለሆነም የጋራ ምክር ቤቱ ህግን የሚጥስ ተግባሩን እሰከ ሦስት ወር ጊዜ ውስጥ የማያስተካክል ከሆነ ኢ.ዴ.ፓ ከጋራ ምክር ቤቱ ሊለቅ እንደሚችል ከወዲሁ ያሳውቃል፡፡

የኢ.ዴ.ፓ ሥራ አስፈፃሚ ኮሚቴ
ነሐሴ 12 ቀን 2008 ዓ.ም
አዲስ አበባ

ሃገራችን ወደ ለየለት ቀውስ ውስጥ እንዳትገባ መከላከል የሁሉም ሃላፊነት ነው!

የኢትዮጵያውያን ዴሞክራሲያዊ ፓርቲ /ኢዴፓ/ ባለፉት ወራት የአዲስ አበባ እና ኦሮሚያ የተቀናጀ ማስተር ፕላን አቅዱን ተከትሎ በተቀሰቀሰው ተቃውሞ ዙሪያና በአማራ ክልላዊ መንግስት ከቅማንት ህዝብ የማንነት ጥያቄ ጋር ተያይዞ በጎንደር የተቀሰቀሰውን ግጭት አስመልክቶ ሁለት ተከታታይ መግለጫዎችን ማውጣቱ የሚታወስ ነው፡፡ ሆኖም ይሄ ታቃውሞና ግጭት ከመቆምና ከመብረድ ይልቅ በተለይ በአንዳንድ የኦሮሚያ ከተሞች ተባብሶ እንደቀጠለ ነው፡፡ በተጨማሪም በጋምቤላ ግጭቶች የተከሰቱ ሲሆን የወልቃይት ጸገዴ ህዝብ የማንነት ጥያቄን ተከትሎ የተፈጠረው ችግርም በአግባቡ ሳይፈታ ተባብሶ የቀጠለበት ሁኔታ መኖሩን ከተለያዩ አቅጣጫዎች የሚደርሱን መረጃዎች ያመለክታሉ፡፡

ኢዴፓ ባለፉት ሁለት መግለጫዎቹ ላይ ግጭቶችን ለማብረድ ተገቢና ዘላቂ የመፍትሄ እርምጃ መንግስት መውሰድ እንዳለበት አሳስቦ እንደነበር የሚታወስ ነው፡፡ ነገር ግን መንግስት ለችግሩ ዘላቂና አስተማማኝ መፍትሄ ከመስጠት ይልቅ እለታዊ ግጭቶችን በማብረድ ላይ ያተኮረ እርምጃ መውሰድን ስለመረጠ በተለይም በኦሮሚያ ክልል ግጭቱ ተባብሶ የሰው ህይወት እየጠፋና የአካል ጉዳት እየደረሰ ነው፣ በመንግስትና በግል ንብረቶች ላይ ውድመት እየደረሰ ነው፣ ከዛም አልፎ ብሄርንና ሃይማኖትን መሰረት ያደረገ ጥቃት እየደረሰ ይገኛል፡፡ ከዚህ እንደምንረዳው በተለያዩ አካባቢዎች የተነሳው ተቃውሞና ግጭት አቅጣጫውን እየሳተና አደገኛ አዝማሚያ እየያዘ መምጣቱን ያሳያል፡፡

ከችግሩ መባባስ ጋር የመንግስት የሃይል እርምጃ ተባብሶ የቀጠለበት መሆኑ ሲታይ መንግስት ችግሮችን በተገቢው ግዜና ሁኔታ በአግባቡ ለመፍታት የሚያስችል ትክክለኛ አቅጣጫ እየተከተለ አለመሆኑን ያሳያል፡፡ መንግስት እየተከተለው ያለው ችግሩን በሃቀኛ ውይይት እና መግባባት የመፍታት ሳይሆን በሃይል እርምጃ የማፈን አቅጣጫ እንደማያዋጣ ተገንዝቦ አስተማማኝና ዘላቂ መፍትሄ ለማምጣት የሚያስችል አቅጣጫ መከተል እንዳለበት ፓርቲያችን አበክሮ ያሳስባል፡፡ ከዚሁ ጋር በተያያዘም በተለያዩ የሃገሪቱ አካባቢዎች የተቃውሞ እንቅስቃሴ እያደረገ የሚገኘው የህብረተሰብ ክፍልም ተቃውሞውን ሰላማዊና ህጋዊ ማድረግ እንዳለበት ኢዴፓ ያምናል፡፡

የህብረተሰቡን የተቃውሞ እንቅስቃሴ ተገን በማድረግም የራሳቸውን ድብቅ አላማ ለማስፈጸም ሲሉ ግጭቱን ለማባባስ ጥረት የሚያደርጉ ሃይሎችንም ኢዴፓ አጥብቆ ያወግዛል፡፡ ህዝቡም በተቃውሞ ሰበብ አብሮ የመኖር ባህላችንንና እርስ በእርስ ያለንን አንድነት ከሚያናጉ ተግባሮችና ድርጊቶች በመቆጠብ የጠባብ ቡድኖችን ርካሽ አላማ መከላከል አለበት፡፡ በእምነት ተቋማት ላይ የደረሰውም ውድመት ፍጹም ተገቢ ያልሆነ ተግባር በመሆኑ ኢዴፓ አጥብቆ እያወገዘ መንግስት ጉዳዩን የሚያጣራ ገለልተኛ ቡድን ባስቸኳይ አቋቁሞ ውጤቱን ለህዝቡ ይፋ እንዲደርግ ኢዴፓ በድጋሚ ይጠይቃል፡፡

በዋናነት ኢዴፓ በተለያዩ መድረኮች እንደምንገልጸው የፌደራል አደረጃጀቱ ከአንድነት ይልቅ ልዩነት ላይ ያተኮረ በመሆኑ በዜጎች ተንቀሳቅሶ የመስራትና ሃብት የማፍራት ህገ መንግስታዊ መብታቸው ላይ ትልቅ አደጋ ፈጥሯል፡፡ በተለያዩ ግዜያት በሃገራችን እየተፈጠሩ ያሉ ግጭቶች ብሄረሰባዊ ማንነት ላይ መሰረት ያደረገም ጭምር መሆኑ የሚሰተዋል ነው፡፡ መንግስት አሁንም በሃገሪቱ ውስጥ እየተፈጠሩ ያሉ ችግሮችን በዘላቂነት ለመፍታት በፌደራል አደረጃጀቱ ላይ ለውን አቋም መመርመር አለበት፡፡

በመጨረሻም በተለይ በአንዳንድ ቦታዎች ላይ እንደታየው ዘርንና እምነትን አስታኮ የሚፈጸም ጥቃት ይህችን ሃገር ወደማያባራ ግጭት ውስጥ ሊከት የሚችል አደገኛ አዝማሚያ መሆኑን ህብረተሰቡ፣ መንግስት፣ የፖለቲካ ሃይሎችና የመገናኛ ብዙሃን ተገንዝበን በህብረት እንድንታገለው ኢዴፓ ጥሪውን ያስተላልፋል፡፡ የኢዴፓ ስራ አስፈጻሚ ኮሚቴ አሁን ያለው ያለመረጋጋት በዚሁ ከቀጠለ ማንም አትራፊ እንደማይሆን እየገለጸ በድጋሚ ሁሉም ሃይሎች ሃገሪቱ ወደ ለየለት ቀውስ ውስጥ አንዳትገባ የየበኩላቸውን ሃላፊነታቸውን ሊወጡ እንደሚገባ ለማስገንዘብ ይወዳል፡

 

የኢዴፓ ስራ አስፈጻሚ ኮሚቴ

የካቲት 16 2008 .

ምርጫው ዴሞክራሲያዊ ፍትሀዊ በሕብረተሰቡም ዘንድ ተአማኒ አልነበረም !!

ከኢዴፓ ስራ አስፈፃሚ ኮሚቴ የተሰጠ መግለጫ

የኢትዮጵያውያን ዴሞክራሲያዊ ፓርቲ (ኢዴፓ) በሀገራችን የመድብለ ፓርቲ የፖለቲካ ስርአት ተገንብቶ ነጻና ዴሞክራሲዊ ምርጫ በሃገራችን ተካሂዶ ህዝቡ ከተለያዩ አማራጮች ይበጀኛል ለሚለው ፓርቲ ስልጣን በውክልና የሚሰጥበት ስርአት እውን እንዲሆን በጽናት ሲታገል ቆይቷል፡፡ ይህ የምርጫ ስርአት ሁሉንም አሳታፊ በሆነ ሁኔታ እውን እንዲሆን በየምርጫዎቹ በመሳተፍ የሚገጥሙ እንቅፋቶችንና ችግሮችን በመቃወምና እንዲታረሙም ትግል በማድረግ የበኩሉን አስተዋፆኦ እየተወጣ ይገኛል፡፡ ከዚህ እምነቱም በመነሳት በ2007ቱ አገራዊና ክልላዊ ምርጫ በቂ ዝግጅት አድርጎ ያለምንም ቅድመ ሁኔታ ወደ ምርጫው በመግባት ለሰለጠነ የምርጫ ስርአት እውን መሆን ያለውን ፍላጎት እንደ ከዚህ ቀደሙ በተግባር አረጋግጧል፡፡

በምርጫውም ውስጥ በነበረው ተሳትፎ በምርጫው ሂደት ላይ በተደጋጋሚ ሲያጋጥሙ የነበሩ እንቅፋቶችና ችግሮች በምርጫው ፍትሃዊነት፣ ዴሞክራሲያዊነትና ተዓማኒነት ላይ ችግር እየፈጠሩ መሆናቸውን በማሳሰብና ድርጊቱንም በመቃወም በተደጋጋሚ መግለጫ መስጠታችን ይታወቃል፡፡ በተጨማሪም ጉዳዩ የሚመለከታቸው አካላት በተለይም ምርጫ ቦርድ፣ ገዥው ፓርቲና የመገናኛ ብዙሃን ለምርጫው ስኬታማነት የበኩላቸውን አስተዋፆኦ እንዲወጡም ተደጋጋሚ ጥሪ ስናደርግ ቆይተናል፡፡

ሙሉውን መግለጫ ለማንበብ እዚህ ይጫኑ። (PDF)

የኢዴፓ የ2007 ዓ.ም የምርጫ መወዳደሪያ ማንፌስቶ

የኢትዮጵያውያን ዴሞክራሲያዊ ፓርቲ (ኢዴፓ) የ2007 ዓ.ም የምርጫ መወዳደሪያ ማንፌስቶ

EDP_Manifesto_Cover

ከኢትዮጵያውያን ዴሞክራሲያዊ ፓርቲ /ኢዴፓ/ የተሰጠ የመልካም ምኞት መግለጫ

የኢትዮጵያውያን ዴሞክራሲያዊ ፓርቲ /ኢዴፓ/ መጭው ዘመን የመድብለ ፓርቲ የፖለቲካ ስርአት የሚጠናከርበት፣ የጥላቻና የኩርፊያ ፖለቲካ ታሪክ የሚሆንበት፣ የመቻቻልና የመከባበር ፖለቲካ የሚጎለብትበት፣ የጭፍን ተቃውሞና ድጋፍ በአማራጭ የፖለቲካ ሃሳብ የሚተካበት፣ ምክንያታዊ ፖለቲካ የሚያብብበት፣ በመጭው 2007 ምርጫ ህዝቡ በተሳትፎው የሰለጠነና የበቃ ህዝብ መሆኑን ዳግም የሚያረጋግጥበት፣ የፖለቲካ ምህዳሩ ሁሉንም አሳታፊ በሆነ መልክ የበለጠ የሚሰፋበት እንዲሆን በመመኘት የሀገርን ዳር ድንበር ለማስጠበቅ በግምባር ለተሰማራችሁ ለመከላከያ ሰራዊት አባላት፣ በማረሚያ ቤት ለምትገኙ ወገኖቻችን፣ እንዲሁም በስደት ከሀገር ውጭ ላላችሁ ወንድሞችና እህቶች በአጠቃላይም ለመላው የኢትዮጵያ ህዝብ በሙሉ መጭው ዘመን የሰላም፣ የጤናና የፍቅር እንዲሆንላችሁ የኢትዮጵያውያን ዴሞክራሲያዊ ፓርቲ /ኢዴፓ/ ስራ አስፈጻሚ መልካም ምኞቱን ይገልጻል፡፡

የኢዴፓ ስራ አስፈጻሚ

በሽብርተኝነት ስም የሚወሰደው እርምጃ ግልጽነት ይኑረው!

ከኢዴፓ የተሰጠ መግለጫ

በአገር ውስጥ በህጋዊ መንገድ ተመዝግበው የሚንቀሳቀሱ የፖለቲካ ፓርቲ መሪዎች ሐምሌ 1 ቀን 2006 ዓ.ም መንግስት በሽብር ጠርጥሮ በቁጥጥር ስር ማዋሉ በሚዲያዎች ተገልጿል፡፡ እነዚህ አመራሮች ከ48 ሰዓታት በላይ ፍርድ ቤት አለመቅረባቸውና የሚመለከታቸው የመንግስት አካላት በጉዳዩ ላይ ዝርዝር መረጃ አለማቅረባቸው አመራሮቹ የታሰሩት በሚያራምዱት የፖለቲካ አቋም እንዳይሆን ፓርቲያችን ስጋት አድሮበታል፡፡

የኢትዮጵያውያን ዴሞክራሲያዊ ፓርቲ (ኢዴፓ) ስራ አስፈፃሚ ኮሚቴ በጉዳዩ ላይ ጥልቅ ውይይት ካደረገ በኋላ የሚከተለውን አቋም ወስዷል፡፡

  1. መንግስት የተቃዋሚ ፓርቲ አመራሮች የተያዙበትን ምክንያት ለህብረተሰቡ ዝርዝር እና ግልጽ መረጃ እንዲሰጥ፤
  2. የታሰሩት የተቃዋሚ ፓርቲ አመራሮች በህገ-መንግስቱ አንቀጽ 21 መሰረት ለዜጎች የተሰጠው መብት እንዲከበርላቸው፤
  3. በአስቸኳይ ፍርድ ቤት እንዲቀርቡ፤ የፍርድ ሂደታቸውም ተአማኒ፤ ግልጽ እና ፈጣን በሆነ መንገድ እንዲታይ እያሳሰብን
    ይህ ሳይሆን ቢቀር ግን የአገሪቱን ህግ አክብረን በሰላማዊ ትግል ከምንንቀሳቀስ ፓርቲዎች ይልቅ ከዚህ በተቃራኒ የሚንቀሳቀሱ ጽንፈኛ ሀይሎችን የሚያጠናክር፤ ክርክራቸውንም ምክንያታዊ የሚያደርግ እና የዴሞክራሲያዊ ግንባታውን ወደኋላ የሚመልስ በመሆኑ ጉዳዩ እጅግ እንደሚያሳስበን እንገልጻለን፡፡

ስለዚህም መንግስት የጉዳዩን አሳሳቢነት ተገንዝቦ አስቸኳይ መፍትሔ እንዲሰጥ ኢዴፓ ያሳስባል፡፡

የኢዴፓ ስራ አስፈጻሚ ኮሚቴ
ሐምሌ 7 ቀን 2006 ዓ.ም

ሰላምና ህብረ-ብሔራዊነት አላማችን ነው!

ለዘላቂ ልማት የፌደራሊዝሙ ጉድለቶች ይታረሙ!

ሰሞኑን በአንዳንድ የኦሮሚያ ከተሞች የተከሰተውን ብጥብጥና በዚህ ምክንያት በሰዎችና በንብረት ላይ የደረሰውን ጉዳት በተመለከተ የኢዴፓ ስራ አስፈፃሚ ኮሚቴ የሚከተሉትን አቋሞች ወስዷል፡፡

  1. የኢዴፓ ስራ አስፈፃሚ ኮሚቴ በጉዳዩ ላይ ባደረገው ውይይት እና ማጣራት ለግጭቱ መነሻ የሆነው ዋና ምክንያት ለአዲስ አበባና ለአጎራባች የኦሮሚያ ክልል ከተሞች የተዘጋጀው የጋራ የልማት መሪ ፕላን መሆኑን ተገንዝበናል፡፡ ኢዴፓ የተዘጋጀው መሪ ፕላን ለአካባቢው የልማት እድገት ጠቃሚ መሆኑንና የአገራችንን ህግጋት የጣሰ አካሄድ አለመሆኑን አምኖበታል፡፡
  2. ማንኛውንም ቅሬታ አለኝ የሚል ወገን ቅሬታው ወይም ተቃውሞው ሊከበርለት ይገባል፡፡ መንግስት በዚህ ጉዳይ ላይ ቅሬታ አለን የሚሉ ወገኖችን (ለሚያነሱት ቅሬታ ሌላ ፖለቲካዊ ትርጉም ሳይሰጥ) በአግባቡ ማዳመጥና ተገቢውን መልስ መስጠት ይገባዋል፡፡
  3. በመሪ ፕላኑ ላይ ቅሬታ ያላቸው ወገኖች ቅሬታቸውን ለመግለፅ ህጋዊና ሰላማዊ መንገድን ብቻ መጠቀም ይኖርባቸዋል፡፡ በሰዎች ህይወት እና ንብረት ላይ ጉዳት በማድረስ ተቃውሞን ለመግለፅ የሚደረገውን ሙከራ ኢዴፓ ያወግዛል፡፡
  4. መንግስት ህግና ስርአት እንዲከበር የማድረግ ሃላፊነት እና ግዴታ ያለበት መሆኑን እንደተጠበቀ ሆኖ በአመፅ መልክ ለሚገለፁ ተቃውሞዎች የሚወሰደው እርምጃ ጥንቃቄ የተሞላበትና በተቻለ መጠን በሰዎች አካልና ህይወት ላይ ጉዳት የማያስከትል መሆን ይገባዋል፡፡
  5. ሰሞኑን በተለያዩ ከተሞች በተፈጠረ ብጥብጥ የሰው ህይወትና የአገር ሃብት ተጠያቂው ማን እንደሆነ በአግባቡ የሚያጣራ ገለልተኛ ኮሚቴ መንግስት እንዲያቋቁምና በተጠያቂው አካል ላይ ህጋዊ እርምጃ እንዲወስድ ኢዴፓ ይጠይቃል፡፡
  6. በአጠቃላይ እንዲህ አይነቱ ብሔራዊ ማንነትን መሰረት ያደረገና ለአገራዊ የልማት እድገት ፀር የሆነውን ጠባብ አመለካከት በአገራችን እየተጠናከረ የመጣውና ምናልባትም ወደፊት የበለጠ ተባብሶ ሊቀጥል የሚችለው በዋናነት በብሔራዊ ማንነት መሰረት ካደረገው የአገሪቱ የፌደራል አደረጃጀት ጉድለቶች በመነጨ ነው፡፡ ይህ አይነቱ ችግር በዘላቂነት ሊፈታ የሚችለው የፌዴራሉ አደረጃጀት እና ፖሊሲዎች ለአገር አንድነትና ለጋራ ልማት በሚበጅ መልኩ  ሲሻሻሉ ብቻ ነው ብሎ ኢዴፓ ያምናል፡፡

የኢዴፓ ስራ አስፈፃሚ ኮሚቴ
                      ሚያዝያ 28/2006 ዓ.ም
                ሰላምና ህብረ-ብሄራዊነት አላማችን ነው!!

በሐረር ከተማ የተፈጠረው ችግር አስቸኳይ መፍትሄ ያሻዋል!

ቀን 02/07/2006 ዓ.ም
ቁጥር ኢ.ዴ.ፓ.023/06

የካቲት 30 ቀን 2006 ዓ.ም ምሽት ሁለት ሰዓት አካባቢ በሐረር ከተማ ከፍተኛ የእሳት ቃጠሎ ተከስቷል፡፡ ከዚህ በፊትም በዚሁ አካባቢ ተደጋጋሚ የእሳት ቃጠሎዎች መከሰታቸው ይታወሳል፡፡ ችግሩ እንደተከሰተ መንግሥት ድርጊቱን የፈፀመውን አካል ለማወቅ የማጣራትና ህብረተሰቡን የማረጋጋት ሥራ መሥራት ሲገባው በተመሳሳይ ቀን በተቻኮለ ሁኔታ ግሬደር አቅርቦ አካባቢውን ማፅዳት በመጀመሩ ህብረተሰቡ በመንግሥት ላይ የተለያዩ ጥርጣሬዎች እንዲያድሩበት ምክንያት ሆኗል፡፡

በዚህም ምክንያት አላስፈላጊ ግጭት ተፈጥሮ ንብረት ወድሟል፣ የንግድ እንቅስቃሴ ተቋርጧል፣ በሰዎችና በሰላማዊ ህይዎታቸው ላይ መጠኑ ያልተረጋገጠ ጉዳት ደርሷል፡፡ ስለሆነም መንግሥት እንደነዚህ እና መሰል ችግሮች ሲከሰቱ በሰከነ መንገድና ግልፅነት ባለው አሰራር ከህብረተሰቡ ጋር እየተመካከረ መፍታት ይገባዋል ብሎ ኢዴፓ በፅኑ ያምናል፡፡ ህብረተሰቡም ግጭቱ አቅጣጫውን ስቶ ተጨማሪ አላስፈላጊ ጉዳት እንዳይደርስ የበኩሉን አስተዋፅዖ ማድረግ ይጠበቅበታል፡፡

በአጠቃላይ በአሁኑ ወቅት የተፈጠረውን ግጭት መንግሥት ቆም ብሎ ችግሩ የተፈጠረበት ምክንያት ምን እንደሆነና ማን እንደፈጠረው በአስቸኳይ አጣርቶ እርምጃ እንዲወስድና በቃጠሎው ምክንያት ጉዳት ለደረሰባቸው ዜጎች ተገቢውን መፍትሄ በአስቸኳይ እንዲሠጥ ኢዴፓ በጥብቅ ያሳስባል፡፡

የኢዴፓ ሥራ አስፈፃሚ ኮሚቴ

ሰላምና ህብረ-ብሔራዊነት አላማችን ነው!