የሽግግር መንግስት ጥያቄ ቋሚ የትግል አጀንዳችን ሆኗል!

ከአብሮነት ለኢትዮጵያ ፌደራላዊ አንድነት (አብሮነት) የተሰጠ መግለጫ

አብሮነት ለኢትዮጵያ ፌደራላዊ አንድነት (አብሮነት) ከግንቦት ወር 2010 ዓ.ም ጀምሮ በአገራችን የተከሰተው “የለውጥ ሂደት” መሰረታዊ የአገሪቱን የፖለቲካ ችግሮች ለመፍታት በሚያስችል አግባብ ያልተካሄደና የከሸፈ መሆኑን በመገንዘብ አገሪቱን ወደ አንድ አዲስና ጤናማ የሽግግር ሂደት የሚያስገባ አማራጭ ሃሳብ በረቂቅ ደረጃ አዘጋጅቶ ለህዝብ ውይይት ማቅረቡ ይታወቃል፡፡

ከኮሮና ቫይረስ ወደ አገራችን መግባት ጋር በተያያዘ በረቂቅ ሰነዱ ላይ በአሰብነው መጠን ህዝባዊ ውይይቶችን ማካሄድ ባንችልም በተለያዩ የመገናኛ ዘዴዎች ቀላል የማይባል የህብረተሰብ ክፍል በረቂቅ ሰነዱ ላይ አስተያየት እንዲሰጥበት ማድረግ ተችሏል፡፡ በአብሮነት አባል ፓርቲዎች ውስጥ ያሉ መዋቅሮች በረቂቁ ላይ በስፋት እንዲወያዩበት የተደረገ ሲሆን ከተለያዩ የመገናኛ ብዙሃን ከተገኙ ግብአቶች በተጨማሪ ከ700 በላይ የሆኑ አስተያየቶች በኢሜል አማካኝነት መሰብሰብ ተችሏል፡፡ የተለያዩ ምሁራንና የፖለቲካ መሪዎችም ሰነዱ እንዲደርሳቸውና ሃሳብ እንዲሰጡበት ማድረግ ተችሏል፡፡

እነዚህን ከተለያዩ የህብረተሰብ ክፍሎች የተገኙ አስተያየቶች ባገናዘበ ሁኔታ የአብሮነት አባል የሆኑት ሶስቱ ፓርቲዎች በረቂቅ ሰነዱ ላይ ሰፊ ውይይትና ክርክር ካካሄዱበት በኋላ ገንቢ የሆኑ ማሻሻያዎችን በረቂቅ ሰነዱ ላይ በማድረግ ይህንን የእርቅና የአንድነት የሽግግር መንግስት እንዲቋቋም የሚጠይቅ ሰነድ የጋራ ሰነዳቸው እንዲሆን ተቀብለውታል፡፡ በይዘት ደረጃ ማሻሻያ የተደረገባቸው ጉዳዮችም ሁለት ናቸው፡፡

አንደኛ- አገር አቀፍ የህዝብና የቤት ቆጠራ ጉዳይ አወዛጋቢ የፖለቲካ አጀንዳ እየሆነ በመምጣቱ የሽግግር መንግስቱ አንዱ ሃላፊነት የህዝብና ቤት ቆጠራ ማካሄድ እንዲሆን፤ ሁለተኛ- የሽግግር መንግስቱ የህገ-መንግስት ማሻሻያ ረቂቅ የማቅረብ ብቻ ሳይሆን በህዝበ-ውሳኔ ህገ-መንግስት የማሻሻል ሃላፊነት እንዲኖረው የሚያደርግ ነው፡፡ እነዚህንና ሌሎች መለስተኛ ማሻሻያዎችን በማድረግ ሰነዱ ከዛሬ ግንቦት 10 ቀን 2012 ዓ.ም ጀምሮ የሶስቱ አባል ድርጅቶችና የአብሮነት ኦፊሴላዊ ሰነድ እንዲሆን የተወሰነ ሲሆን የአገራችን የፖለቲካ ሃይሎችና ህዝቡ ጥያቄውን እስከሚቀበሉት ድረስ ሰነዱ አንድ ቁልፍ የፖለቲካ የመታገያ አጀንዳችን ሆኖ እንዲቀጥል ተወስኗል፡፡

አብሮነት በወቅታዊው የአገራችን የፖለቲካ ሁኔታ ላይ የረጅም ጊዜ ግምገማ አካሂዶ የደረሰበት አቋም “አገራችን ኢትዮጵያ ከእንግዲህ መዋቅራዊ ችግሮቿን በአስተማማኝ ሁኔታ ሊፈታ በሚችል ውጤታማ የሽግግር ሂደት ውስጥ ማለፍ እስካልቻለች ድረስ እንደተለመደው በየአምስት ዓመቱ የይስሙላ ምርጫ በማካሄድ ወደ መዋቅራዊና ዲሞክራሲያዊ ስርአት ልትሸጋገር አትችልም” የሚል ነው፡፡

በአሁኑ ወቅት በስልጣን ላይ የሚገኘውና ከሁለት አመት በፊት ስልጣን ለመያዝ የበቃው ብልፅግና ፓርቲ በአገሪቱ ውጤታማ ሽግግር ለማካሄድና ተጨባጭ ለውጥ ለማምጣት ቃል ገብቶ የነበረ ቢሆንም ቃሉን ጠብቆ የኢትዮጵያን ህዝብ ወደ መዋቅራዊ ዲሞክራሲ ማሸጋገር አልቻለም፡፡ ፓርቲው ለህዝብ የገባውን ቃል ወደ ተግባር ለመለወጥ የሚያስችል እውቀትና ልምድ ብቻ ሳይሆን ቅንነትና ፍላጎት የሌለው ሃይል በመሆኑ ምክንያት አገሪቱን ወደ በጎ አቅጣጫ ከመምራት ይልቅ የራሱን የፖለቲካ ስልጣን በማጠናከር ወደ ለየለት አምባገነናዊ ሃይልነት መቀየርን የመረጠ ይመስላል፡፡

ይህ ሃይል እራሱንም ሆነ አገሪቱን ወደ ከፍተኛና ውስብስብ የፖለቲካ ቀውስ ውስጥ ከማስገባቱ በፊት፣ በአገሪቱ የምንገኝ የፖለቲካ ሃይሎችና የአገሪቱ ዋና ባለቤት የሆነው ህዝብ ተባብረን በህጋዊና ሰላማዊ ትግል ወደ ትክክለኛው መስመር እንዲገባ ካላስገደድነው በስተቀር በአጭር ጊዜ ውስጥ በታሪካችን አይተነው ወደማናውቅ አምባገነናዊ ሃይል እራሱን ሊቀይርና አገሪቱንም ከባድና ውስብስብ ወደ ሆነ አደጋ ሊያስገባት ይችላል፡፡

አብሮነት አገራችንን ከእንዲህ አይነት አስፈሪ ጥፋት መታደግ የሚቻለው በቂ የስነ-ልቦናና የመዋቅር ዝግጅት ያልተደረገበት አገራዊ ምርጫ በማካሄድ ሳይሆን፣ ለሁለት አመት የሚቆይ ሁሉን አቀፍ የሆነ የእርቅና የአንድነት የሽግግር መንግስት በማቋቋም ነው ብሎ በፅኑ ያምናል፡፡
መዋቅራዊ የሆኑ የፖለቲካ ችግሮቻችንን በአግባቡ ለመፍታት በሚያስችል የሽግግር ሂደት ውስጥ እስካላለፍን ድረስ ግን ላለፉት 29 ዓመታት በስልጣን ላይ በቆየው ገዢ ፓርቲ፣ በስራ ላይ ባለው ህገ-መንግስት እየተመራንና ከአለፉት አምስት ምርጫዎች ያልተለየ ስድስተኛ ዙር ምርጫ በማካሄድ የአገራችንን ችግሮች በዘላቂነት መፍታት አንችልም፡፡ እንዲያውም ስድስተኛውን አገራዊ ምርጫ ካለፉት ምርጫዎች የተለየና የተሻለ ማድረግ እስካልቻልን ድረስ አገራችን ህልውናዋን ወደሚፈታተን የእርስ በእርስ ጦርነት ወይም መንግስት የለሽ ሁኔታ ልትገባ ትችላለች የሚል ከፍተኛ ስጋት አለን፡፡ ይህንን የሽግግር መንግስት ሰነድ ብዙ ተጨንቀንና ተጠበን እንድናዘጋጅ ያስገደደንም ይኸው ስለ አገራችን ህልውና መቀጠል የሚሰማን ስጋት ነው፡፡
ይህ ለአገራችን ህልውና መቀጠል መድህን የሚሆን የሽግግር መንግስት መቼና እንዴት ሊቋቋም ይችላል? በማንና ለምን ሊቋቋም ይገባዋል? ሂደቱና የመጨረሻ ግቡስ ምን ሊሆን ይችላል? የሚሉትን ጥያቄዎች በዝርዝር ለመመለስ በሚያስችል መጠን ተዘጋጅቶ ቀርቧል፡፡ ስለሆነም-

ገዢውን ፓርቲ ጨምሮ በአገሪቱ የሚገኙ የፖለቲካ ፓርቲዎች “አገራችን ሰላማዊ፣ ነፃና ፍትሃዊ ምርጫ አካሂዳ በዘላቂነት ወደ መዋቅራዊ ዲሞክራሲ ለመሸጋገር በምን አይነት የሽግግር ሂደት ውስጥ ማለፍ ይገባታል?” በሚለው ጥያቄ ዙሪያ የየራሳቸውን ዝርዝር አማራጭ ለውይይት እንዲያቀርቡ፤

የኮሮና ቫይረስን ስርጭት በአግባቡ ለመቆጣጠር የሚደረገውን ጥረት በማያስተጓጉል ሁኔታ መንግስት የፖለቲካ ፓርቲዎች በሚያቀርቧቸው አማራጭ ሃሳቦች ዙሪያ ውይይትና ድርድር አካሂደው የጋራ መፍትሄ የሚያመነጩበት አገራዊ የምክክር ሂደት /National Dialogue/ በፍጥነት እንዲያመቻች፤

የኢትየጵያ ህዝብም በአንድ ውጤታማ የሽግግር ሂደት ማለፍ ለአገሪቱ ችግሮች በዘላቂነት መፈታት አስፈላጊና የማይተካ ሚና ያለው ቅድመ-ሁኔታ መሆኑን በመገንዘብ አገራዊ የምክክር ሂደት እንዲጠራ የራሱን ግፊትና ትግል እንዲያደርግ አብሮነት በአፅንኦት ይጠይቃል፡፡

ከዚህ ውጭ ገዢው ፓርቲ ላለፉት 29 ዓመታት እንዳደረገው ሁሉ አሁንም “የአገሪቱን እጣ-ፈንታ መወሰን የሚገባኝ እኔ ብቻ ነኝ” በሚል መታበይ ወይም “እኔ አሻግራችኋለው” በሚል ያልተገባ ፍልስፍና በስልጣን ላይ የሚቀጥል ከሆነ ግን አገሪቱ በከፍተኛ ፍጥነት ወደ አደገኛ የብጥብጥ አዙሪት ልትገባ የምትችልበት እድል ሰፊ ነው፡፡ አገራችን ከዚህ አይነቱ አሳሳቢ ስጋት ወጥታ ወደ ዘላቂ ሰላማዊና ዲሞክራሲያዊ ስርአት እንድትሸጋገር ሁሉም የህብረተሰብ ክፍል በየበኩሉ የሚጠበቅበትን ድርሻ እንዲወጣ አብሮነት ጥሪውን ያቀርባል።

አብሮነት ለኢትዮጵያ ፌደራላዊ አንድነት (#አብሮነት)
ግንቦት 10 ቀን 2012 ዓ.ም
አዲስ አበባ

Share this...
Share on Facebook
Facebook
Tweet about this on Twitter
Twitter