የህዳሴ ግድብ ድርድር ሙሉ በሙሉ ወደ አፍሪካዊ ማዕቀፍ መመለስ አለበት!

ከአብሮነት ለኢትዮጵያ ፌደራላዊ አንድነት (አብሮነት) የተሰጠ መግለጫ

አብሮነት ለኢትዮጵያ ፌደራላዊ አንድነት ( አብሮነት) በኢትዮጵያ፣ በግብፅና በሱዳን መካከል የህዳሴ ግድብን አስመልክቶ የሶስትዮሽ ድርድር በዋሽንግተን ዲሲ ከተጀመረ ጀምሮ ድርድሩ የአገራችንን ጥቅም የማያስጠብቅ በመሆኑ ኢትዮጵያ ራሷን ከሂደቱ እንድታወጣ ደጋግሞ ሲጠይቅ እንደነበረ ይታወሳል፡፡
መንግስት ይህንን የአብሮነት አቋም በአግባቡና በተገቢው ጊዜ በመገንዘብ ራሱን ከድርድሩ ማውጣት ባለመቻሉ አገራችን ላይ ከፍተኛ የዲፕሎማሲ አጣብቂኝና ጫና እንዲፈጠር አድርጓል፡፡ ሆኖም ህዝቡና የተለያዩ የህብረተሰብ ክፍሎች በፈጠሩት ጫና ተገዶ ዘግይቶም ቢሆን መንግስት የድርድሩን ሂደት አቋርጧል፡፡

የአብሮነት አቋም በጉዳዩ ላይ ድርድር መካሄድ የለበትም የሚል ሳይሆን ድርድሩ የአገራችንን ጥቅም በሚያስጠብቅ አግባብና ሂደት መካሄድ አለበት የሚል ነው፡፡ ድርድሩ አግባብነት ባለው ሂደት መካሄድ አለበት ስንልም፣ ድርድሩ መካሄድ ያለበት የግብፅ ወገንተኝነት ባላቸው አገሮች አደራዳሪነት ሳይሆን ገለልተኝነታቸው በማያጠራጥር አፍሪካዊ አገሮች ወይም ተቋማት መሆን አለበት የሚል ነው፡፡
ኢትዮጵያ የዋሽንግተን ዲሲውን ድርድር በማቋረጧ ምክንያት የተጨነቀችው ግብፅ በአሁኑ ወቅት ድርድሩ እንደገና እንዲቀጥል እየጠየቀች መሆኑን እየሰማን ነው፡፡ የኢትዮጵያ መንግስትም ዘግይቶም ቢሆን በጉዳዩ ላይ ከአፍሪካ ዲፕሎማቶች ጋር እና በተለይም ከሱዳን መንግስት ጋር መወያየት መጀመሩን እያየን ነው፡፡ አብሮነት ይሄንን የህዳሴ ግድብ ድርድር ጉዳይ ወደ አፍሪካ ማዕቀፍ የመመለስ ሙከራ በፅኑ ይደግፋል፡፡ መንግስት ይህንን በጎ ጅምሩንም አጠናክሮ መቀጠል አለበት ብሎ ያምናል፡፡

ስለሆነም የግብፅ መንግስት ድርድሩ እንደገና እንዲቀጥል መጠየቁ በጎ ሃሳብ መሆኑ እንደተጠበቀ ሆኖ፣
1ኛ- ከእንግዲህ ድርድሩ መቀጠል ያለበት በዋሽንግተን ዲሲና በአሜሪካ መንግስትና ተቋማት አደራዳሪነት ሳይሆን አፍሪካዊ በሆነ ማዕቀፍ ብቻ መሆን እንዳለበት፤
2ኛ- ድርድሩ የሚካሄደው በውሃ ክፍፍል ጉዳይ ሳይሆን በግድቡ የውሃ አሞላል ጊዜ ላይ ብቻ እንዲሆን፣
3ኛ- ግድቡን በማንኛውም ጊዜ የመሙላት መብታችን ከድርድሩ መጀመር ወይም ከድርድሩ መሳካት ጋር በፍፁም እንዳይያያዝ፣
4ኛ- ከአሁን በኋላ ህዳሴ ግድብን አስመልክቶ የሚካሄደው ድርድር እንደ እስካሁኑ በችኮላና በተድበሰበሰ ሁኔታ ሳይሆን በግልፅነት፣ በአሳታፊነትና ተቋማዊ በሆነ አሰራር እንዲሆን አብሮነት ይጠይቃል፡፡

አብሮነት ለኢትዮጵያ ፌደራላዊ አንድነት ( አብሮነት)
ግንቦት 15 2012 ዓ.ም
አዲስ አበባ

Share this...
Share on Facebook
Facebook
Tweet about this on Twitter
Twitter